兩个月進前，佇報紙面頂看著「三芝飛碟屋」deh beh 拆掉ê消息，即兩禮拜歇睏日佇淡水，專工去飛碟屋遐翕相。毋知是毋是飛碟屋beh拆掉ê關係，歇睏日ê飛碟屋，足濟翕影師chhôa媠姑娘仔佇遐leh翕寫真集，那親像菜市仔遐呢鬧熱！聽講三芝飛碟屋內底有魔神仔，毋拘，可能是去hō遐呢濟人拍著驚，走了了，一點仔鬼仔厝ê氣氛就攏無。
三芝飛碟屋已經拋荒30冬，兩个月進前三芝飛碟屋突然間出現佇報紙面頂，主要是講，飛碟屋ê地主hām債權銀行已經對還債ê計畫喬好勢，台北縣政府按算欲kā飛碟屋攏總拆掉，擱起一間新ê渡假村，hām無外遠ê淺水灣沙埔仔串連起來做海濱休閒園區。
兩個月過去，飛碟屋遐擱無啥物動靜，頂歸工我kā電話去台北縣政府工務局探聽消息，怹講，地主hām銀行 iah擱有淡薄仔待誌 iah未講好勢，所以怹 iah 毋敢拆。怹講，北海岸景緻真嫷，毋拘，拋荒30冬ê飛碟屋實在真歹看，「有礙觀瞻」；而且縣政府嘛驚人佇遐假鬼假怪，影響治安，只要地主hām銀行怹雙方一講好勢，縣政府就隨時kā怪手開過去， 攏總拆掉！
毋拘，我感覺kā三芝飛碟屋攏總拆掉有一寡拍損，文建會應該比照台北市彼間中正廟，kah指定做國定古蹟！
飛碟屋拄a好hām中正廟同款，攏是起佇1970年代。kha輸講，中正廟、圓山飯店、歷史博物館代表官方強欲佇台灣延續中國傳統宮廷建築ê思維，按呢，飛碟屋遮呢特殊ê建築，會使講是欲掙脫當時主流ê宮廷建築風格ê束縛。擱再講，1970年代後尾，台灣通過石油危機ê考驗了後，經濟起飛，人民ê所得kah 懸，生活有kah快活，飛碟屋渡假村ê出現，反應到彼當時ê人，毋免干單為著三頓走縱，身軀邊嘛開始有一寡錢，想beh hām先進國家ê人同款，欲試看mai怪奇、稀罕ê待誌ê心理。
所以講，咱會使透過飛碟屋，瞭解到30冬前彼當時ê社會狀況hām人ê想法。飛碟屋雖然拋荒30冬，毋拘，伊猶原會使講出屬於伊hit leh時代ê故事！
即兩冬，三芝飛碟屋佇網路面頂界紅、界出名，兩冬前我搭佇flickr面頂ê飛碟屋
相片，真濟國外ê網友看到遮呢特殊ê造型hām拋荒了後，散發出來ê氣氛攏感覺真趣味，嘛有一寡外國ê網友寫批問阮，欲去飛碟屋愛按怎行？後尾，阮才瞭解，原來飛碟屋會使講是「台灣奇景」！甚至講，佇全世界嘛找無第二个遮呢特別ê所在！佇網路面頂ê討論嘛真鬧熱，你kā 孤狗大神拜一leh，伊就kā你講出一大貫飛碟屋ê故事！
即兩禮拜阮去飛碟屋翕相，看到真濟外國人嘛佇遐翕相！這敢無就是便便ê，會使吸引遊客ê「觀光景點」？kha輸講，縣政府加用一寡頭殼，kā拋荒ê飛碟屋重頭包裝做全球獨一無二ê觀光景點，廣告擱kā催落去，敢驚無人bē來cit tor？敢驚無錢thāng趁？
華語對譯，
兩個月前，在報紙上看到「三芝飛碟屋」就要拆掉的消息，這兩個星期趁著在淡水休假，專程跑去飛碟屋那裡拍照。不知道是不是飛碟屋要拆掉的關係，假日的飛碟屋，很多攝影師帶著漂亮美眉在那裡拍攝寫真集，好像菜市場般熱鬧呢！聽說三芝飛碟屋有鬼，不過，可能是被那麼多遊客嚇到了，都走光光，一點鬼屋的氣氛都沒有。
三芝飛碟屋已經荒廢30多年，兩個月前三芝飛碟屋突然又出現在報紙上，新聞重點是，飛碟屋的地主和債權銀行已經對還債計畫講好了，台北縣政府打算把飛碟屋通通拆掉，再蓋一間渡假村，和附近的淺水灣海灘串連起來，當做海濱休閒園區。
兩個月過去，飛碟屋那裡還是沒什麼動靜，前幾天我打電話去台北縣政府工務局探聽消息，他們講，地主和銀行還有一些事情還沒談攏，所以他們還不敢拆，不過持續關注交涉進度。他們說，北海岸的風景漂亮，可是，荒廢30年的飛碟屋實在很難看，「有礙觀瞻」；而且縣政府也怕有人在那裡裝神弄鬼，影響治安，所以，只要地主和銀行雙方談妥，縣政府馬上就把怪手開過去， 通通拆掉！
可是，我覺得把三芝飛碟屋通通拆掉有點可惜，文建會應該比照台北市的中正廟，指定成國定古蹟！
飛碟屋剛好和中正廟一樣，都是在1970年代建造的。如果說，中正廟、圓山飯店、歷史博物館代表官方硬要在台灣延續中國傳統宮廷建築的思維，那麼，飛碟屋這麼特殊的建築，可以說是要掙脫當時主流的宮廷建築風格的束縛。再說，1970年代末期，台灣通過石油危機的考驗，經濟起飛，人民的所得較高，生活品質有較好，飛碟屋渡假村的出現，反應了當時的人們，不再只為三餐奔波，身邊也開始有了一些錢，也想和先進國家人們一樣，想嘗鮮，試試新奇、稀罕玩意的心態。
所以說，我們可以透過飛碟屋，瞭解30年前，當時的社會狀況和人們的想法。即使飛碟屋已經荒廢30年，可是，她還是可以說出屬於她那個時代的故事！
這兩年，三芝飛碟屋在網路上很紅、很出名，兩年前我貼在flickr上面的飛碟屋
相片，很多國外的網友看到這麼特殊的造型和荒廢之後，所散發出來的氣氛，都覺得很有趣。也有一些外國的網友寫信問我，要去飛碟屋該怎麼走？後來，我才知道，原來飛碟屋可以說是「台灣奇景」！甚至，在全世界也找不到第二個這麼特別的地方！在網路上的討論也很熱鬧，你給孤狗大神拜一下，祂就會跟你說出一大串飛碟屋的故事！
這兩個星期我去飛碟屋拍照，看到很多外國人也在那裡拍照！這不就是現成的，可以吸引遊客的「觀光景點」？如果說，縣政府多用一點腦筋，把荒廢的飛碟屋重新包裝做全球獨一無二的觀光景點，廣告再強力放送下去，還怕沒有人來玩嗎？還怕沒錢可賺嗎？
很喜歡您的blog，每次看到您用閩南文發文，都覺得您是一個熱愛台灣的台灣人！真的超熱血的啊！當然您的照片也讓人非常感動！