翻箱倒櫃看照片

淡水後山，2004.11，Dora攝影


歇睏佇淡水時，阮甲意佇門埕看冊，明明邊仔iah koh有一liâu椅仔，阮丹丹總是愛搶阮ê「寶座」。m拘，伊總是搶bē贏阮，規氣就kā阮當作伊ê膨椅坐！

她iah leh讀幼稚園時，koh真細漢，theⁿ佇阮ê身軀頂iah koh會堪 ti；阮牽手翕即張相片hit當時，她已經小學三年囉，愈來愈懸，愈來愈重，mā愈來愈皮，她bē koh乖乖theⁿ leh，一翻身就予阮喘不過氣。hit當時，阮牽手就kah阮講：千萬千萬毋通怨歎喔，她即馬iah koh細漢，iah koh願意依倚你ê邊仔，等候koh過幾年，伊大漢時，你kah ko-chiâⁿ，伊才無bē chhap你leh！


koh 兩禮拜，丹丹就beh 小學畢業囉！有當時a，伊mā是會kah阮當做伊ê膨椅坐。伊即馬40規公斤，是一个青春少女，伊theⁿ佇阮ê身軀頂，少寡tin 動，阮ê骨頭就ghiong beh散了了，ghiong beh bē喘氣！阮想著三冬前，阮某kah阮講ê ：「伊大漢時，你kah ko-chiâⁿ，伊才無bē chhap你！」，啊！就算骨頭散了了、bē喘氣，阮mā愛忍leh！愛偷笑！




華語對譯，



休假在淡水時，我喜歡坐在院子裡看書，明明旁邊還有一張椅子，丹丹老是喜歡搶我的寶座坐。她總是搶不贏我的，索性就把我當作她的沙發椅。


她還是幼稚園的小娃娃時，還小，躺在我身上還好；老婆拍這張照片時，她已是小三了，越長越高，體重越來越重，而且越來越皮，她不再乖乖躺著，一翻身就讓我喘不過氣來。那時老婆就告誡我：千萬千萬不要抱怨！她現在還小，還願意窩在你的懷裡，過幾年她長大了，你求她，她都不理你！


再兩個星期，丹丹就要從小學畢業了！有時候，她還是會把我當做她的沙發椅坐。她現在已經40多公斤，是個青春少女，她躺在我的身上，稍微動一下，我的骨頭都快散了，都快喘不過氣來！我想到三年前，老婆對我說的那句話：「過幾年她長大了，你求她，她都不理你！」啊！就算骨頭散掉、喘不過氣，我都要忍耐！要忍耐！要偷笑！