極光 希望

（一） 話頭

台灣話語是台灣民族天生的聲嗽，一款參中國人分別上好的特徵；用家已的台灣話語，互咱家已信心十足，佫會避免去用北京語、華語的輸人一截的失志。有語無文的台灣話語，無法度生存佇現代世界舞台，唯語行夠文的境界，文學是上好的媒介。而且，文學作品會 「內化」 夠人心裡，變成民族文化的基因，文化基因親像指南針規範民族的行為；嘛會塑造民族意識，幫贊催生建立民族國家。按呢生，台語文、台語文學誠是台灣民族的活泉，伊誠是台灣獨立建國的紅毛土、強力膠。

（二）台灣史略

台灣島嶼自古早道有人生存，南島語族生湠上千上萬年。自十六世紀台灣踏入世界舞台，漢移民唯福建及廣東湧入來，台灣變成一個 「唐山公南島媽」 所傳湠的民族。四百年來，台灣社會行過風風雨雨的歷史，一再受著外來政權的踐踏。夠今，猶原無建立家己的國家。反抗外來政權是台灣民族的傳統，無疑誤，反抗精神拄拄好是近代台灣文學的主題之一。第二次世界大戰了後，中國國民黨佇 1949 年逃亡來台灣，帶來一波北京語族群，怹自稱是 「高級外省人」，限制台灣人講台灣話；殖民統治台灣六十年，將台灣拖入中國共產政權痟想併吞的陷阱裡。

繼承反抗的傳統，戰後有血有目屎的六十年的抗爭，台灣民族漸漸踏入獨立建國的路。佇民族國家的三大要素裡，台灣人民已經行來夠經濟及政治獨立的大門。萬不幸，台灣文化猶原無本土化，台灣文化猶未獨立；台灣文化猶原受著中國文化的宰制。按呢生，雖然民進黨執政八年，台灣民族的國家定位猶原一遍混亂，致使台灣民族國家猶無法度起造起來。

（三） 台灣各族群的母語權益及義務

多族群的台灣民族，欠缺和諧，因為中國國民黨政權獨尊北京語族，壓制福佬、客家及南島語族。和諧是民族國家建立的重要條件；和諧著愛建立佇族群平等的基礎之上。有平等才有和諧，有和諧才有環境互所有的族群發展怹的才能。族群母語平等發展道是足重要的一項。雖然，福佬、客家及南島語族漸漸取得經濟及政治應有權益的分配率。但是，怹猶唔知爭取家己族群的文化權益，親像掌管族群生死的台灣人母語權益。結局是：台灣文化猶原互中國文化罩死死，未喘氣。

親像多數族群的福佬人，唔知唔敢抑是無知，總是，煞無肯定家己族群的文化權益，親像無要緊發展家己的台語文。無家己族群文化的指導，煞是那像無頭的胡蠅，酷酷踅，亂亂蹤，造成無方向的台灣社會。無方向的社會道是欠缺正常發展的內部因素 （內因）；內因道是基因，是社會走向、嘛是民族行為的指南針。雖然佇公元二千年，政權輪替夠民進黨，因為，無台灣文化這款內因的指導，受著中國文化彼款外來因素 （外因） 的宰制之下，民進黨政權的政治運作是一遍混亂。經過八年，一個台灣人總統，台灣之子的政治運作，是宓佇所謂的中間路線：驚東佫驚西，驚南嘛驚北，甚麼攏驚；完全無台灣文化觀，完全欠缺台灣語文意識及行動，轉型正義唔敢進行；「高級外省人」 看咱衰，煞食咱食甲夠夠。事實上，總統即款無頭胡蠅的行為，拄拄好是濟濟台灣人現此時的心態。

每個族群著愛擔起家己族群的義務，同時嘛著爭取保謢家己族群的權益。親像飛機飛航中出意外，需要戴氧氣罩，空服人員攏按呢講：家己先戴好，然後才去幫忙別人戴。共款的道理，著愛先照顧家己族群先徛起來，然後才有可能幫贊其他族群。若是放棄家己族群的權益，道是那像放棄氧氣罩，煞講是為著族群和諧，事實上是無知的行為，是害著家己族群，亦連帶損害其他族群。因為，無知的結局有二項。第一、是無發揮家己族群的能力，第二、是互其他族群看衰。無發揮家己族群的天生才能，對全台灣社會是一大損失。互其他族群看衰，怹煞軟土深掘。上界淺顯的例，道是北京語族看衰福佬語族。因為福佬人唔敢肯定家己應得著的權益，親像唔敢行使家己的台語權益，唔敢寫家己的台語文學。怹講咱是沙文，其實是怹惡霸，唔是咱沙文。結局北京語族猶原咧軟土深掘，怹將中國文化箍佇咱頷管，處處欲押台灣人行向互中國併吞的路。

台灣文學界的華語文寫作者、評論家、讀者，有的已經覺醒，行上台語文學的路。不而過，嘛猶有足濟的軟腳蝦。軟腳蝦放殺家己族群的母語及母語文學，美化作是咧促進族群和諧。唔知家己族群天生的語文牛角，宛然是一隻放棄天生牛角的水牛，煞互人穿鼻仔，牽去園裡犁田，牽去拖牛車，老來互人牽去牛灶，宰！台灣人放棄天生的權益牛角，會互人牽去北京剥皮。

世界各民族攏足肯定家己的母語母語文。上界有力的例道是英倫三島的倫敦口語，彼是唯德國西北部來的央格魯 — 捒克孫語 — 所發展出來的英語文。當年英國人若無堅持家己族群母語英文，煞滿足使用諾曼蒂統治者的官方法語文，就無今仔日的英語英文。滿州人征服中國，統治中國人，政治及經濟總掌，卻是放殺家己的滿州語文，採用中國語文；結局是家己消滅滿州民族，因為怹煞比中國人佫卡中國人。欲反身的台灣人著愛思考即項殘酷的歷史事實：語文選擇可以是無形的民族殺手。道是講：無台灣語，免講台灣獨立建國；有台灣語無台灣文，嘛免數想。夠今，勉強講來，咱是猶有台灣語，但是猶無活跳的台灣語文。往往活跳跳感動人的一場台語演講，出現佇報紙雜誌的是：一篇華語文，即款的獨立建國運動是行一半路，永遠未達夠目標。這款心態參馬英九，宋楚瑜佇選舉時，凊彩揦二句仔福佬話，客家語，原住民話語，是差不多的：無心！這款無心的心態，親像摩西手下的猶太人，逃脫埃及地的奴隸命，但是，行未夠迦南地自我解放。愛會記持，咱台灣人嘛有咱的嘉南地，行會夠抑是行未夠，憑看台灣語文有出脫無！

（四）台語文學可形成台灣民族萬世不變的基因

民族經濟活動創造社會生活的物質，政治運作進行經濟成果的適當分配。文化活動構成民族生活的主要內容。民族文化有三大方面，第一、規範民族食衣住行的生活，第二、展視民族的政治、宗教、法律、哲學、… 等等的思想，第三、創作民族的美術、歌舞、文學等等的藝術。民族文化會塑造民族的特性，表現民族的特殊風格，變成民族堅定的認同及色彩，一代傳過一代，漸漸內化成民族基因。堅定的民族基因色緻怎樣日曝、雨沃、風揙、敵人來漂白，永永遠遠未褪色。敵人想欲來污染咱的基因色彩，佇民族一體認同之下，絕對會無計代價，起來保護。歷史上，台灣民族有過無惜生命，用竹篙鬥菜刀，起來參日本征台軍的大砲機關槍，血戰半年。但是，拄著中國人的併吞野心，台灣人煞軟惜惜，原因是咱無台灣人意識，甚至自認是中國人，文化上認同中國。九年前，有民進黨的官員竟然按呢講：「文化上我是中國人，政治上我是中華民國的國民。」 文化上唔是台灣人，文化上煞是中國人，當然台灣民族煞是一隻文化的軟腳蝦，無法度 「政治、經濟、文化」 三枝民族大柱徛在在，台灣民族國家的起造煞是軟腳。

文學寫民族的生活，文學抒寫民族的思想，文學呈現民族的感情藝術。文學按呢處處見證民族文化，文學累積民族文化，代代相傳，內化成民族的基因。文學按呢凝聚民族的特性、風格、面貌。親像莎士比亞的文學塑造英國民族的特性風格面貌，互英國人一款怹特有的色彩，永遠未褪色。台灣母語文學嘛可以來彩繪台灣人的面貌風格特性，互台灣人色彩顯明永永久久。

人類社會早年的文學以口傳存在，靠著族群母語一代傳過一代。親像台灣原住民南島語族的神話傳說，一代傳過一代，內化夠原住民族的民族基因，怹樂天知命，天生的歌手。口傳文學當然是母語文學。來夠文字時代，書面文學嘛自然以母語文來書寫。文學本誠道是語言藝術，本誠道是以母語文來抒寫，除非受著外來政權的壓制，才不幸脫離母語文。

文學藝術就伊的形式來講可以分出詩、散文、小說，怹的形式會影響內容的呈現及取捨。就語文來講，文學的形式可以採用母語抑是非母語。一般來講，作家的母語上有條件掌握作家的感受，上準確，嘛上傳神。因為，唔免經過母語及非母語之間的轉譯過程。咱知影，作品無法度百分之百翻譯，一翻道會走失。創作本誠道是上好用母語，用母語文是天經地義。十四世紀以來，西歐各民族國家的形成，道是配合家已的民族母語書寫怹的民族語文。用非母語寫作常常是殖民統治的結果。但是，雖然被殖民，被殖民的民族文學攏是一再回歸母語的過程。近代台灣民族文學的發展道是一再回歸母語的過程。在日本殖民統治之下，有 1920 至 30 年代的台語文學的回歸運動，就是唯日語及北京語回歸台語寫作。在中國國民黨的殖民統治之下，有 1970 年代以來的台語文學：福佬語、客語、南島語的文學，是在北京語文學獨尊之下，一款必然的反抗，一款回歸台語母語文學的必然，一款文學藝術天性：用母語寫作的文學天律。戰後台語文學的回歸運動，出現佇七十年代的鄉土小說。鄉土小說的抒寫文，攏是用北京語文，對白卻是真濟人採用台語文。文學藝術的天律規範：「對白」 必然著愛採用母語台語文，互小說有真實、精準、傳神的美感。這款台語文對白的寫法，出現在戒嚴真厲害的七十年代，甚至出現佇官方舉辦的徵文比賽的得獎小說裡，御用文人嘛無可奈何，只好按呢講：「對白不妨用台語，描寫則不宜用台語。」

母語及非母語透濫的鄉土文學作品，是一款過渡時期的文學形式，這款形式無法度逹成上高的藝術水平。事實上，即款透濫的語文形式，是苦毒讀者，逼讀者進行思考分裂的閱讀。佇八十，九十年代，百分之百台語文學出現，有台語詩、台語散文、台語小說，包括福佬語、客語及南島語等等的台語文學作品。總講一句，台語母語是上界四配的語文形式，台語文學才上有才調逹成最高度的台灣文學藝術水平；北京語文、日語文、英語文攏無才調寫出有藝術高度的台灣文學作品。因為，外來語寫台灣文學，那像洗身軀穿一重紗，怎樣洗嘛洗未爽啦，即款半仿仔的文學無法度參台灣人跋感情啦。當然，現此時，台語文學猶唔是台灣文學的主流，但是，台語文學是咧成長中，有濟濟的台語文學刊物，親像《蕃薯詩刊》、《島鄉文學》、《菅芒花》、《台灣e文藝》、《台文戰線》、《罔報》、《海翁台語文學》、《海翁教育》、《掌門》…。猶有濟濟的台語文組織，「國家台灣文學館」 嘛有咧主辦台語文學的徵文，親像胡長松的台語小說 〈金色島嶼之歌〉 得著 2008 台灣文學獎台語小說金典獎，寫活古早平埔族及漢移民的地方故事；台灣學院自 2005 年以來，道年年舉辦《台語文學國際學術研討會》，年度台語文學選集嘛佇三年前行上舞台。台語文學夠今主要是民間自力救濟行出來的，當然，咱繼續愛行文化抗爭，這，道愛靠政治抗爭，靠關心獨立建國運動者的覺醒及參與，按呢，腳步才會卡緊！

（五）結語
二、三十年來，台灣各族群的台語母語文學是一直活潑成長中。咱有信心台語文學是族群和諧共生著愛行的道路。早前劇烈反對台語文學的人數，嘛漸漸有減少去，這是一款覺醒，這是一款進歩，這亦是母語文學的必然。

講夠底，台語文學其實是一款族群權益。唔知爭取家己族群的權益是無知，不止是無法度發揮本族群的天生才能，佫會製造社會混亂的內因，在敵人處處想欲併吞的外因之下，互咱台灣民族國家的建國運動處處有陷阱。台語文學是台灣民族文學的必然道路，台灣文學的主流一再演變，台語文學是咧提升至台灣文學的主流地位．你著愛掠著潮流，緊踏入來，作伙來開拓台灣文學的新舞台：台語文學。無台灣語文，無台語文學的台灣獨立建國運動，只是永遠軟腳蝦！

台灣各族群的台語文學攏健康發展，台語母語文學湠生各族群的多彩美麗的文學花園；才是台灣族群有法度和諧相處的正路，台語文學誠是台灣民族的活泉。

（作者是機械工程師，台灣文學寫作者，現此時，徛佇美國賓州茉里鄉）