Astroviolin ê Búlo̍k

Choèkīn bé 1 pún sin sûtián, pàiit ê sî cháu khì Tâioân ê Tiàm bé ê, Engbûn Tâibûn Sûtián.

Goá siūⁿbeh ài chitpún chheh íkeng ū chi̍ttoāⁿ sîkan ah. Che sī inūi chū goá o̍h Tâibûn tha̍ksiá kàu taⁿ, lóng itti̍t sī chhâ Úngiân lāusu siat ê Tâi-Hoâ Soàⁿténg Sûtián. M̄koh teh chhâ ê sî, sī nálâiná kámkak ánne bôkàu. Inūi chitê soàⁿténg sûtián, sī iōng "gísû tùi hoane̍k" ê chòhoat. M̄koh ánne tī chinchoē chênghêng, to̍h kantaⁿ sī "Hànjī ti̍tchiap iōng Tâigí tha̍k chhutlâi," bôhoattō͘ chhâtio̍h sio-kâng ìsù m̄koh oânchoân to̍hsī Tâigí kónghoat ê gísû. Goá kòjîn kámkak, chitmá itpoaⁿ thiaⁿtio̍h ê Tâigí, lúlâilú Hoâgíhoà. Sūsi̍t siōng, tiantò chinchoē gísû kap sio̍kgí lóngsī ùi Tâigí thoân kàu Hoâgí. M̄koh chitmá goá soah hun boē chhutlâi, koh tiantò kámkak goá náē kóngoē lóng ánne ti̍te̍k. Chíū tīleh tha̍k Tâibûn kengtiám, chhiūⁿ "Cha̍phāng Koánkiàn", "Lāigoākho Khànhō͘ha̍k" ê sî, chiah ē siūⁿ kóng -- "Ah! Goânlâi chiaê chiah sī chiàⁿkáng ê Tâibûn gísû."

To̍h inūi ánne, chū kài chá khaisí to̍h siūⁿbeh bé chi̍tpún "iōng Tâibûn lâi káisoè" ê sûtián -- Eng-Tâi a̍h hó, Ji̍t-Tâi a̍h hó, Tâi-Tâi sī siōngkài chán. Chiū goá só͘ chaiiáⁿ ê, Eng-Tâi to̍h chitpún, Tâi-Tâi kantaⁿ 1 pún "Ēmn̂g Im Sin Jītián," Ji̍t-Tâi ū 1 pún "Ji̍t-Tâi Toā Sûtián." M̄koh kîtiong, "Ēmn̂g Im Sin Jītián" sī iōng Tâibûn Lômájī khì káisoè múichi̍t ê Hànjī, m̄sī káisoè múichi̍t ê Tâibûn gísû, si̍tiōngsèng soah pìⁿ bô hiah koân. Ji̍t-Tâi hit pún... Goá si̍tchāi bé boē lo̍hkhì >""< -- $Tâiphiò 8,800 neh!

Chū ánne, goá to̍h bé chitpún Eng-Tâi sûtián. Bétio̍h tongjiân sī putchíá hoaⁿhí!

M̄koh khólêng sī inūi i sī 1970 nîtāi Maryknoll chhutpán ê, goá kámkak i māsī ū chi̍tpō͘ siūtio̍h Hoâgí énghióng. Lēnggoā iê gísû mā siuliáu bôkóng kài choē, m̄koh goá jīnûi che mā bô kài giâmtiōng. Siōng boéá 1 tiám sī, goá kámkak iê gísû lóng káisoè kah siuⁿkoè tn̂g... Goá ē siūⁿkóng, kámkóng lóng bô chi̍tê sio tùièng ê sû?

Kóng khílâi māsī chhùbī, goá íchêng to̍hsī siūⁿbeh chhoē chi̍tê m̄sī gísû tùièng, sī hoane̍k ê sûtián. Kiatkó chitmá iōngtio̍h chitpún koh siūⁿkóng, náē bô kántan ê gísû tùièng leh? Hah hah!

Goá siūⁿ che to̍h oânchoân sī inūi goáê gíbûn bôkàu hó lo͘h. Tâibûn si̍tchāi sī chi̍tê chin chhim ê ha̍kbūn. Khoàn jīnhô 1 pún sûtián lóng bôkàu, kantaⁿ o̍hliáu Lômájī mā iáu bôkàu. I sī sengoa̍h ê gígiân, sī lúichek tìse̍k ê gígiân.

Mā hibāng ētàng ū nálâiná choē chitchióng húchō͘sèng ê chheh chhutpán. Chhiūⁿ kúi kògoe̍h chêng Tanghng Tâioângí Sûtián tī Ji̍tpún chhtpán, goá íkeng pàithok khì Ji̍tpún sńg ê pêngiú tàu bé. Suijiân goá Ji̍tbûn bô kài hó, m̄koh goá jīnûi che tùi goá ê gíbûn ittēng ū chin toā ê pangchō͘!