Astroviolin ê Búlo̍k

Tâioân Bînchú Kìliām Koán ê N̄gīⁿthiāⁿ tēhāsek ê Piáuián Gēsu̍t Tô͘sukoán lāité, chuliāu si̍tchāi putchíá choē! Siōngkài pókùi ê to̍hsī i bôlūn kokchióng CD, DVD, a̍hsī chheh, phó͘; koklāi bôtè bé ê, íkeng choa̍tpán ê, lóng siu kàichoē.

Inūi goá púnsin chòpeng ê tanūi to̍h tī Tâi-Bîn Koán tùibīn, goá chitmá tiāⁿtiāⁿ khì chioh CD tǹglâi thiaⁿ. Che si̍tchāi sī kài hongpiān ê 1 kiāⁿ tāichì. Inūi ài thiaⁿ kó͘tián imga̍k ê lâng lóng chaiiáⁿ, kó͘tián imga̍k itpoaⁿ lóng ū kài choē bôkâng iánchhut pánpún. Íchá goá teh tha̍k tiongha̍k ê sîchūn, tiāⁿ lóng siūⁿbeh thiaⁿ kúināê pánpún lâi chò píkàu. M̄koh che ài khai kài choē chîⁿ. 1 ê tiongha̍k seng bô khólêng ū chit chióng lêngle̍k. Taⁿ ū chitê tô͘sukoán, tùi goá chit chióng thiaⁿchiòng kóng khílâi si̍tchāi kài hoaⁿhí!

Ji̍pkhì Piáuián Gēsu̍t Tô͘sukoán ê chukeh to̍hsī sinchhéng chò N̄g-īⁿthiaⁿ ê hoēoân. Tùi tiāⁿ khì N̄gīⁿthiaⁿ khoàⁿ piáuián ê koanchiòng èngkai sī kài ta̍ttit sinchhéng. Goá íkeng sinchhéng tēsì tang ah. M̄koh, íchêng lóng kantaⁿ khah chia̍p khì thiaⁿ imga̍k hoē, soah bô tiāⁿ khì chioh chuliāu. Ū siūⁿbeh chò, m̄koh chioh 1, 2 pái to̍h bô kèsio̍k. Si̍tchāi chin bôchhái! Hó kachài taⁿ chò khangkhoè ê tētiám kīn, sǹgkóng ū hóhóá līiōng.

Kiàngī ta̍kke, nāchún ū hèngchhù, Piáuián Gēsu̍t Tô͘sukoán choa̍ttùi sī 1 ê ta̍ttit ta̍kke tiāⁿtiāⁿ khì kiâⁿkiâⁿ leh, khoàⁿ iáⁿphìⁿ, thiaⁿ imga̍k ê hó só͘chāi!