Astroviolin ê Búlo̍k

Tāithè Ia̍h tī Sêngkongniá hun chò 16 ê tiongtūi. Tī chia ê 32 kang lāi, siōng toā ê 2 ê oa̍htāng sī "chhùbī písài" kap "kunkoa písài". 16 ê tiongtūi chòhoé pí, pí liáu thâuchêng 5 miâ lóngū pàng poàⁿkang kàu 1 kang ê hiohkhùn.

To̍h inūi ánne, tī chia ta̍kkang lóng ài chhiùⁿ kunkoa. Jîchhiáⁿ goá hoathiān, ta̍kke putkoán jīntông koasû a̍h bô, lóngē sánseng chi̍tkoá "kongêng kám". Chit chióng kongêng kám ū khólêng sī inūi ū 1 chióng ta̍kke kiōngton̂g thoânkiat phahpiàⁿ sánseng ê kámchêng; māū khólêng sī inūi hòngká sánseng ê.

M̄koh, teh chhiùⁿ chiah-ê koa ê s'ūn, goá oânchoân thiaⁿ boē chhutlâi che sī lán Tâioân ê kunkoa. Chiah-ê koa chhaputto lóng kúinā cha̍p tang ah. Suijiân loēiông khólêng ū tāmpo̍há káikoè, pílūn íkeng bô "殺朱拔毛", m̄koh "反共復國大業", "復興中華" ia̍hsī tiāⁿtiāⁿ ū. Goá tī bûnchiuⁿ siōng boéá, ē kā goá o̍htio̍h ê koasû lóngchóng khǹg khìlih.

Goá jīnûi, to̍hsī chitchióng koa teh bānbāná énghióng lán ê jînbîn. Iûkî sī ùi chitchióng koa tektio̍h "kongêng kám" ê s'ūn, tùi koasû ê loēiông ia̍h chiāmchiāmá chiapsiū ah.

Kuntūi èngkai ài "kokka-hoà", jîchhiáⁿ lán Tāithè Ia̍h kinpún mābô sǹg chèngsek ê kunlâng. Goá hibāng ētàng chhiùⁿtio̍h lán Tâioân katī ê koa. Goá m̄sī "中國的駱駝", mā m̄sī "龍的傳人". "長城", "黃河" mā m̄sī goá "依戀生長的地方". Jîchhiáⁿ chiah-ê koa kèngjiân oânchoân bô kóngtio̍h Tâioân. Goá hibāng Kokhông Pō͘ ētàng pān "Tâibûn Kunkoa Koasû písài". Hō͘ lán tûliáu tuikiû "kuntūi kokka-hoà", mā ētàng kohkhah kakiông jînbîn tùi lán Tâioân kokka ê thiàⁿsim.