雙餘館

今仔日提物件返去予阿嬤，阿嬤交待我給阮爸講：「叫恁爸爸mai去大陸chhit tho矣，即馬外口攏是人che。」

阿嬤講的，當然就是最近逐工新聞攏咧報的新型流感。我會記得以早流行禽流感的時，阿嬤捌講彼陣流行的是「雞瘟」，所以咱較mai呷雞肉。我聽起來「瘟」佮「che」攏是咧講傳染病，但是che即个音較罕得聽著，特加是彼句古早咧罵人的歹聽話，叫做「著死囡仔che」。

所謂的死囡仔che，就是講囡仔得著傳染病，一死就死一大堆。（另外一句「死囡仔脯」就是講囝仔死真濟，四界沒人收，予日頭曝到變脯）但是為啥乜咱會講囡仔che、人che，毋是囡仔瘟、人瘟咧？而且，即个che，到底是佗一字？我抵路上一直想，發音較接近的是祭，但是既然是一種傳染病，大概就是要加一个病的部首，哪安呢，是不是「瘵」？查字典了後，又閣感覺意思佮聲調攏無像。瘵雖然是病無毋著，但是伊是指肺癆即款慢性病，雖然會傳染，但是袂大規模人穢人、to來to去。

後來用發音去查台文／華文線頂字典，才知影原來che是「災」的另一種唸法。而且，讀作che的時陣攏是指傳染病，親像雞災（ke che）、豬災（ti che）、災瘟（che un）、著災（tioh che）。哪是別種个災，像風災（hong chai）、水災（chui chai）、救災（kiu chai）、消災（siau chai），就讀作chai。

所以，阮阿嬤雖然毋捌字，嘛聽無國語報的新聞，但是伊會曉讀作人che，表示伊知影這毋是豬災、雞瘟，是會人to予人的人災。我看阮阿嬤的病理觀念比起真濟人攏較好哦！



華文對譯：

今天拿東西回去給阿嬤，她交待我告訴爸爸「叫你爸爸不要去大陸玩了，現在外面都是人che。」

阿嬤說的，當然就是最近每天新聞都在報導的新型流感。我記得以前流行禽流感時，阿嬤曾說過那時候流行的是「雞瘟」，所以我們還是少吃點雞肉。在我聽起來「瘟」和「che」都是在講傳染病，但是che這個音比較少聽到，最多就是那句古時候罵人的難聽話，叫做「著死囡仔che」。
所謂的死囡仔che，就是說小孩子得了傳染病，一下子就死了一大堆。（另外一句「死囡仔脯」就是說死了很多小孩，到處沒人收拾，被太陽曬到被成人乾）但是為什麼我們會說囡仔che、人che，而不是囡仔瘟、人瘟呢？而且，這個che，到底是哪一個字？我在路上一直想，發音較接近的是祭，但是既然是一種傳染病，大概就是要加一個病的部首，這樣說來，是不是「瘵」？查了字典以後，又覺得意思和聲調都不像。瘵雖然是病沒錯，但是它指的是肺結核這種慢性病，雖然會傳染，但是不會大規模的人傳人、傳來傳去。

後來用發音去查台文／華文線頂字典，才知道原來che是「災」的另一種唸法。而且，讀作che的時候都是指傳染病，像是雞災（ke che）、豬災（ti che）、災瘟（che un）、著災（tioh che）。如果是別種的災，像風災（hong chai）、水災（chui chai）、救災（kiu chai）、消災（siau chai），就讀作chai。

所以，我阿嬤雖然不識字，也聽不懂國語播報的新聞，但是她知道要讀作人che，表示她知道這不是豬災、雞瘟，是會人傳人的人災。我看我阿嬤的病理觀念比起很多人都還要好哦！