過年時仔逐家攏呷大魚大肉，拄收假我就來寫即篇，毋是我刁工欲變鬼變怪，嘛毋是欲勸大家減肥，其實這个感想我已經想足久啊。
我認為儉腸捏肚即句俗語特別講个是呷物方面个儉。細漢个時陣媽媽煮飯阮佇灶腳鬥相工，撿蔥仔削菜頭，阮媽媽定定會伸手共我手中的菜刀、摳刀夯過去，教我切蔥仔个頭个時，愛切較偎蔥仔根彼爿，留較濟蔥仔白；削菜頭个皮愛較輕手leh，袂使削傷厚，按呢賰个菜頭肉才袂傷少。切包心白仔个時，菜心愛留起來，焢湯會較甜。所以自囝仔時，我就知影物件雖然細項，嘛是愛撿惜。
最近即幾年，我開始對呷物个典故、傳說真有興趣，真愛聽一寡仔人家手路菜个故事。我發見有真濟平常時仔煮个、呷个古早菜，攏真有儉、撿惜个精神。像進前佇north怹兜講起厝內吃肉粕仔个作法，肉粕／油粕就是piak豬油賰个粕仔，不管是thè呷亦是提來炒菜，攏是予真濟人懷念个滋味。
猶閣有中部人才bat呷過个麻芛，這是黃麻个幼葉，本來種黃麻是為著欲打草索仔、布袋，毋是將伊當作菜。但是佇經濟無好个時代，甘願真厚工共黃麻个幼葉nóa兼搓閣洗幾若擺，摻蕃薯、魚脯仔煮作麻芛湯，這敢毋是儉？
阮兜自一、兩年前開始，定定呷一出菜，就是煎虱目魚骨。即種虱目魚骨是予人撩去腹肚肉賰个，頂面猶有一寡魚肉，聽講別人買虱目魚骨是買返去焢湯，但是阮媽媽共提來煎佮赤赤赤，閣淋豆油、摻當歸落去煮，變作一出真落飯个鹹母。阮爸定定講起即出菜是偌經濟閣好呷，因為這虱目魚骨，本底是欲掞掉个，即馬竟然變作阮兜飯桌頂个主菜，這嘛是一種撿惜啊！
而且，大家有注意著否？儉佮撿个字型干旦差倒爿个手爾爾。欲儉就是愛逐樣撿啦。以早我讀一本食譜，頂面教人共削落來个菜頭皮、香菇蒂、蔥仔尾攏撿起來凍咧，等到欲焢湯个時就共掞落去，加減仔添一寡仔滋味。我不但有照做，順煞連湯嘛用雞骨頭落去焢。有一暝，我拄仔欲共彼个焢湯个物件ko起來，雄雄想著，我用來焢湯个物件敢毋是大部分个人攏欲掞掉个廚餘？若安呢講起來，我即鼎湯毋著變作廚餘湯？想到遮，我家已煞笑出來。廚餘湯雖然真歹聽，但是湯頭袂歹喔。
---------------------------------------------------
[華文對譯]
過年時大家都吃大魚大肉，剛收假我就來寫這篇，不是我故意作怪，也不是要勸大家減肥，其實這感想我已經想很久了。
我認為儉腸捏肚這句俗語特別講的是食物方面的節儉。小的時候我媽媽煮飯我在廚房幫忙，挑蔥削蘿蔔，我媽常常會伸過手來接過我手中的菜刀、削皮刀，教我切蔥的時候，要切得比較靠近蔥根的部分，留較多的蔥白；削蘿蔔時也要輕手一點，不可以削太厚，這樣留下的蘿蔔肉才不會太少。切包心白菜時，菜心要留下來，熬湯比較甜。所以從小時候開始，我就知道東西雖然小，還是要愛惜。
最近這幾年，我開始對食物的典故、傳說很有興趣，很愛聽一些人家拿手菜的故事。我發現有很多平常時煮的、吃的古早菜，都很有節儉、愛惜的精神。像之前在north他家講起家裡吃肉粕仔的作法，肉粕／油粕就是炸豬油剩下的渣，不管是單吃或是拿來炒菜，都是讓很多人懷念的滋味。
還有中部人才吃過的麻芛，這是黃麻的嫩葉，本來種黃麻是為了編草繩、織布袋，不是把它當作菜。但是在經濟不好的時代，寧可很費事的把黃麻的嫩莖又揉又搓又洗好幾次，再加蕃薯、小魚乾煮成麻芛湯，這不就是節儉嗎？
我家自一、兩年前開始，常吃一道菜，就是煎虱目魚骨。這種虱目魚骨是讓人割去了肚腹肉後剩下的，上面還有一點魚肉，聽說別人買虱目魚骨是買回去熬湯，但是我媽把它拿來煎得赤黃，再淋上些醬油，加幾片當歸下去煮，變成了一道很下飯的主菜。我爸爸常常都說這道菜既經濟又好吃，因為這虱目魚骨，本來是要丟掉的，現在竟然變成我家飯桌上的主菜，這也是一種愛惜啊。
而且，大家有沒有注意到？儉和撿的字型只差左手邊的提手旁而已。要節儉就是要每樣東西都撿拾啦。以前我讀一本食譜，上面教人把削下來的蘿蔔皮、香菇蒂、蔥尾段都撿起來凍著，等到要熬湯時就把它丟下去，多少增加一點滋味。我不但有照做，順便連高湯也用雞骨架去熬。有一天晚上，我正要把那些熬湯的東西撈起來，忽然想到，我用來熬湯的東西難道不是大部分的人都要丟掉的廚餘嗎？如果照這樣說起來，我這鍋湯豈不變成了廚餘湯？想到這裡，我自己笑了出來。廚餘湯雖然很難聽，但是湯頭還不錯喔。
