雙餘館

吃潤餅佇阮兜是大待誌，四大房个囝孫攏會返來參加。有當時仔清明袂到都先呷一遍，清明彼工又閣呷一遍。

呷潤餅進前，我嘛真愛看人咧拭潤餅皮。好个潤餅皮愛韌閣薄，卡袂一下都破去。今年麵粉起價，潤餅皮舊年一斤一百，今年起到一斤百二，算算咧一張是七箍銀。伊彼隻手晃幾下，然後佇鼎上搵一下畫一个箍仔，彼丸麵又閣晃起來，有夠好看。過一時仔潤餅皮熟矣，都會使掀起來邊仔囥乎涼矣。

呷潤餅尚好是家已動手，佮會趣味。佇潤餅皮个上面舖一層閣一層个菜，然後佮捲作長長个一條，即咧動作叫做「裹(gao)潤餅」，毋是包潤餅。裹好个潤餅嘛是講一裹、兩裹，無人講一條、兩條。我咧裹潤餅个時陣，阿公佇邊仔講：「妳安捏傷大裹，會包袂起來。」我越頭佮阿公講：「阿公，你小等咧，我裹一个媠媠个予你看。」等我裹好，阿叔嘛呵咾我个潤餅包了真紮閣真媠。




九十歲个阿公說：「我自成個月前都開始咧想欲呷潤餅矣。」伊个手提个即裹潤餅是我裹个。




阿嬤講阿祖嘛真愛吃潤餅。

今年準備个潤餅菜攏總有十六種，裹个時陣愛有一寡技術。首先，菜袂使囥佇潤餅皮个中央，愛囥佇下面，按呢佮會好裹。阮攏會佇尚下面舖一片（通常是阿嬤種个）Ａ仔菜葉佮蛋皮，按呢菜个湯水卡袂sip出來。像澹澹濕濕个韭菜珠佮芹菜珠都囥卡中間，頂面摻糖粉佮土豆麩，按呢糖粉佮會溶去，甜份嘛卡會平均。當然嘛袂使無囥滸苔，哪無呷起來都是感覺欠一味。即四、五年來，阮兜个人閣愛用wasabi糊佇潤餅皮个邊仔，有當時仔落手傷重，咬落去會gang一下目屎強強欲漣出來。



菜遮呢濟，但是阿嬤猶咧唸講：「欠一味茼蒿，今年个茼蒿攏種袂媠。」




呷潤餅是祝歡喜个待誌，但是確實真麻煩，平常時厝內人哪是無濟嘛卡無機會呷，雖然菜巿仔嘛有擔仔咧賣，但是用料總是加真差，沒家已厝內作个遮呢好呷。所以阮見若裹潤餅，攏會請一寡親戚朋友來同齊裹。昨仔買个潤餅皮差不多有一百二十張，最後只賰幾張仔爾爾，攏總呷去个菜差不多有四、五十斤，參加个人攏總有八口灶。

但是一年干旦呷一擺个潤餅，我感覺真無夠kui。聽講阿公昨暝對樓上落來，看著桌頂空空，真失望，講：「哇，攏呷了了啊？」所以阮个潤餅總管－－屘叔講，既然逐家愛呷，過幾工欲閣來吃一遍。

阮兜个人愛呷的程度真正有夠厲害，對否？


舊文回收：潤餅考古　（閣再看一擺，感覺我彼首詩作了真好，哈哈，家已褒卡袂臭臊！）